اف یہ رشتے دار

اف یہ رشتے دار 

 رشتے دار بھی عجیب مخلوق ہیں ان میں جاسوسی کے جوہر اسقدر پائے جاتے ہیں کہ یوں معلوم ہوتا ہے جیسے نجومیوں کی لڑی سے ہوں اور نقاد ایسے کہ گویا تاج محل میں بھی نقص بتانے میں عار محسوس نہ کریں 

نئے سوٹ کو دیکھتے ہی اسکا ڈیزائن پچھلے سال کا ہے کہنا اپنا فرض سمجھتے ہیں امارت کو حرام کا پیسہ قرار دیدیں گے غربت کو ہڈحرامی کی وجہ بتادینگے مصروفیت کو غرور کہتے ہیں اور فارغ ہوں تو ویلے کہلائیں گے 

سارا سال بات نہیں کرینگے مگر رزلٹ کے دن بطورِ خاص پیکج لگا کر ناک میں دم کردینگے نمبر زیادہ ہوں تو مشکوک سمجھتے ہیں کم ہوں تو غافل کند ذہن کا سرٹیفکیٹ تھما دینگے

عید پہ عیدمبارک کی کال بھی آپ کال نہیں کرتے ہم ہی کرتے ہیں جیسے شکوؤں سے بھرپور ہوگی شادیوں پہ روٹھ کے بیٹھنا ان پہ فرض ہے اور ہمارا ان کی منت سماجت کرنا واجب 

فوت شدگان کو ولی اللہ ثابت کرنیوالے یہ رشتے دار زندہ لوگوں کیلیے وبالِ جان ہوتے ہیں 

مزید پڑھیں: کانپیں ٹانگ جاتی ہیں

اور تو اور جنازے پہ بھی انکے بیانات آرہے ہوتے ہیں کہ باپ کماتا مرگیا ڈھنگ کا کھانا نہیں دیا 

انکی تعریف کرکے آپ ان سے اپنی تعریف بھی کروا سکتے ہیں مگر اس میں بھی طنز شامل ہوگا

 اگر آپ خوبصورت ہیں تو یہ کریموں کی وجہ سے ہے اگر رنگت سانولی ہے تو آپکے دل کی میل آپکے چہرے پہ آنے کا فتویٰ جاری کردیا جاتا ہے

اگر آپ خاموش طبع ہیں تو یقیناََ آپ میسنے ہیں اور اگر باتونی ہیں تو چالاک ترین کہلوانے کیلیے تیار رہیں 

مزید پڑھیں: عورت ہونا بھی جرم ہے لوگو

آپکی برینڈڈ چیز کو بھی عام اور اپنی عام چیز کوبھی برینڈڈ ثابت کرنے میں مہارت رکھتے ہیں 

آپ سے مشورہ بھی لیں گے تو تائید کیلیے اور مطلوبہ نتائج نہ ملنے پہ سارا قصور آپکے سر ڈال دینگے

اپنی اولاد کو قابل ترین اور دوسرون کی اولاد کو نالائق ترین دلیل کیساتھ ثابت کرینگے 

افففف اللہ بچائے رشتہ داروں سے 

تحریر: پروفیسر نور مسعود